O PSdeG defendeu que a posición que mantén o Estado ante a Comisión Europea no procedemento aberto pola prórroga da concesión da AP-9 na que avoga por manter a súa xestión en mans privadas corresponde a unha postura "técnica" de Avogacía do Estado que non atende criterios "políticos".

Así o asegurou o portavoz da executiva do PSdeG, Julio Torrado, a preguntas dos xornalistas durante unha comparecencia de prensa celebrada na tarde deste martes na sede dos socialistas galegos en Santiago.

Alí, o exparlamentario autonómico incidiu en que a postura expresada polo Minsiterio de Transportes na carta remitida á Comisión Europea onde defende a postura de evitar o rescate polo prexuízo para as arcas públicas parte dun posicionamento "técnico" da Avogacía do Estado.

Para Torrado, o "debate" da AP-9 divídese entre a titularidade da infraestrutura e a gratuidade; e os socialistas galegos consideran o segundo prioritario. "É máis importante que se levanten as barreiras a que o asfalto cante o himno", ironizou.

Neste sentido, abundou en que a transferencia da titularidade da autoestrada para a súa xestión desde Galicia (o Congreso tramita o cuarto intento lexislativo do Parlamento galego) "é importante" pero "a realidade" é que "nese debate" o "verdadeiramente importante é a gratuidade" das peaxes.