A Escola de Organización Industrial (EOI) foi galardoada co segundo Premio de Mellores Prácticas de Xestión de Fondos Europeos, en recoñecemento á iniciativa 'Rías Baixas, Destino Intelixente Smart Destination', desenvolvida xunto coa Deputación de Pontevedra con cofinanciación de fondos FEDER europeos. Nesta ocasión, o primeiro premio foi para o proxecto presentado polo municipio grancanario de Santa Lucía.

O obxectivo último da iniciativa é converter a provincia de Pontevedra nun dos primeiros destinos intelixentes en España, que fidelice ao turista actual e capte outros novos, grazas á prestación de máis e mellores servizos por parte das empresas do sector turístico da provincia. Así mesmo, búscase cambiar a forma en que se xestionan e mostran os recursos turísticos desta provincia, co uso do TIC, por exemplo, coa implantación dunha plataforma web.

Desta forma o proxecto premiado, 'Rías Baixas, Destino Intelixente Smart Destination', pretende implantar cambios no concepto tradicional de turismo, abrindo o sector a novos segmentos e oportunidades, desestacionalizando a oferta e buscando unha maior eficiencia.

Para Miguel Sánchez Galindo, director de Innovación, Emprendedores e Pemes da Escola de Organización Industrial, este galardón 'é un premio como unha boa práctica nacional pola incorporación e a involucración das pemes no deseño dos programas e na execución dos mesmos, que é un dos principais obxectivos da Comisión Europea para xerar emprego e riqueza económica".

"O premio é un recoñecemento a todo o traballo que realiza EOI e todo o seu equipo durante estes anos, que supuxo a execución de 70 millóns de euros en programas de innovación para pemes", indicou. Este investimento, asegurou, "supuxo, nos dous últimos anos, o apoio a máis de 10.000 pequenas e medianas empresas e este é un exemplo dos máis de 150 proxectos que fixemos por toda a xeografía nacional".
 
Fundada en 1955, a Escola de Organización Industrial (EOI) é a escola de negocios decana en España e unha das máis antigas de Europa. Vinculada ao Ministerio de Industria, Enerxía e Turismo, máis de 70.000 antigos alumnos pasaron polas súas aulas nos seus 60 anos de historia.