Máis dun 40% dos fogares galegos chegaba con dificultade ou moita dificultade a final de mes en 2023 e un 17,3% estaba en risco de exclusión social, segundo se desprende da Enquisa Estrutural a Fogares publicada este venres polo Instituto Galego de Estatística (IGE), recollida por Europa Press.

En concreto, un 35,05% das familias termina o mes con dificultade, mentres que un 6,65%, con moita dificultade. Pola súa banda, o 58,3% restante chega a día 30 con facilidade ou moita facilidade. "En 2023, a porcentaxe de fogares galegos que chegan con facilidade ou moita facilidade a fin de mes aumenta en 1,53 puntos", explica o informe.

Pola súa banda, un 17,3% dos galegos está en risco de exclusión social, caendo en 1,33 puntos respecto de 2022. Por idades, diminuíu en todos os grupos. O de entre 50 e 64 anos é o que rexistra unha taxa máis alta, cun 21,52% dos casos.

TIPOS DE FOGARES

Entre outros datos, a enquisa tamén recolle que o tipo de fogar máis habitual en Galicia é o de parella con fillos, representando o 28,51% do total en Galicia. Pola súa banda, case un 23,8% son unipersonais e un 25,24% son de parellas sen fillos. Os monoparentais quedan no 10,4%. Ademais, o 24,6% dos fogares galegos están compostos por persoas de 65 anos ou máis.

A MOCIDADE

Así, en case o 80% dos fogares galegos non reside ningún menor de 16 anos, alcanzando esta porcentaxe o 83,85% do total na provincia de Ourense e quedándose no 77,88% en Pontevedra. Ademais, o 93,76% dos fogares de Galicia non conta con ningún menor de 5 anos.

Entre moitas cifras, máis dun 60% de mozos galegos de entre 18 e 34 anos vive cos seus pais. Dos que teñen entre 25 e 34 anos e que viven cos seus pais, o 13,5% non ten ingresos. Esta porcentaxe sobe ata o 42,7% no caso de entre 18 e 24 anos.