O alcalde de Ourense, Gonzalo Pérez Jácome, avanzou a intención de levar a pleno os orzamentos nunha sesión extraordinaria o próximo día 23 de maio e, de non saír adiante as contas, advertiu de que formulará unha cuestión de confianza para forzar a súa aprobación tras levar desde o ano 2020 cos orzamentos prorrogados.

Nunha nota de prensa, o Goberno local explicou que o orzamento "xa se atopa en intervención na fase de fiscalización", para o que o servizo "ten como data límite para emitir o seu informe o 15 de maio". Así, "tras negociar cos grupos da oposición", o Executivo de Pérez Jácome ten intención de convocar unha sesión extraordinaria do pleno o día 23 de maio. De non aprobarse na sesión plenaria, explica, o rexedor ourensán formulará unha cuestión de confianza para forzar a súa aprobación.

Segundo detallou, o proxecto prevé un incremento dun 10% en relación co de 2020 e no capítulo de gasto social preténdese incrementar un 20%. No capítulo de ingresos, o Goberno municipal afirma que "conxela a totalidade dos impostos" e "practicamente a totalidade das taxas, coa excepción de tarifa da auga, modificada por imperativo da Comisión Europea". Paralelamente, engade, "levou a cabo unha revisión das bases de execución, normativa que acompaña os orzamentos, para asemellalas á maioría dos concellos de gran poboación".