A deputada do BNG Montse Prado afirmou que a Consellería de Sanidade non executou case 50 millóns dos 83 millóns de euros do Plan de Saúde Mental que, manifestou, foron anunciados "por activa e por pasiva".

Así o trasladou despois de que este martes se coñecese o informe do Consello de Contas que recolle que o Sergas executou entre os anos 2021 e 2023 algo máis de 24,5 millóns de euros ao amparo do seu plan de saúde mental, cando o previsto inicialmente, na memoria económica, eran 29,1 millóns.

"O informe di que non se investiron neste plan, a pesar de estar anunciados e repetidos por activa e por pasiva. Está aí a hemeroteca en sede parlamentaria, en rolda de prensa, no Consello da Xunta", aseverou.

Segundo lembrou a parlamentaria nacionalista, o informe do Consello de Contas sostén que "na memoria económica do Plan contemplábanse 29 millóns", pero o que se gastou "foron 24,5 millóns, 4,5 menos dos que estaba no informe".

Deste documento, Montse Prado tamén mencionou que sinala que "non se executaron proxectos" considerados "como prioritarios". Apuntou que é un plan "raquítico" e que "non se dota de recursos suficientes".

Nesta liña, destacou que "persisten as desigualdades" e que non se logrou reducir as listas de espera, "sendo grave o que ocorre en Lugo e Ourense".

PIDE EXPLICACIÓNS

Así, pediu explicacións a Sanidade porque, na súa opinión, "despois de coñecer este informe, o prometido e o feito, dista moitísimo".

"Parécenos que isto merece explicacións e así as imos a demandar porque falamos de algo moi serio. Unha situación da saúde mental en Galicia que aumenta exponencialmente, que deixa tiradas a miles de persoas, que na última publicación de listas de espera son máis de 9.000 persoas que esperan por unha primeira consulta psiquiátrica", censurou.

Tras expor a situación, Prado lamentou que o PP "volve burlarse dos galegos" anunciando "unhas contías e unhas actuacións que despois non executa".

Nesta liña, reivindicou que as recomendacións do Consello de Contas son as que "reclama o BNG no Parlamento desde hai dous anos: aumento de persoal, psicólogos clínicos, máis coordinación entre atención primaria e hospitalaria e entre as consellerías de Educación, Sanidade e Política Social".

"Cada novo informe do Consello de Contas é unha radiografía da mentira permanente que é o modo de gobernar do PP. Está a quedarlle un álbum de fotos para esconder nun caixón porque é o retrato da mentira permanente, as promesas, os titulares que despois nunca se executan", subliñou.