Por Europa Press / Redacción | SANTIAGO DE COMPOSTELA | 13/05/2025
A actual xefa da área de Información da CRTVG, María Concepción 'Concha' Pombo Romero, protagonizará a comparecencia preceptiva en comisión na Cámara autonómica previsiblemente a finais deste mes e, se non hai contratempos, quedaría ratificada como substituta de Alfonso Sánchez Izquierdo á fronte da corporación que aglutina os medios públicos autonómicos antes do parón que fai no verán o Lexislativo.
Son os prazos que, de acordo coas normas que regulan o procedemento e coa recente lei da Corporación de Servizos Audiovisuais de Galicia (CSAG, nova denominación da ata agora CRTVG), manexan os grupos parlamentarios despois de que o PPdeG rexistrase este martes a proposta de Pombo como candidata.
O portavoz parlamentario do PPdeG, Alberto Pazos, esgrimiu que a vontade dos populares é "axilizar o máximo posible" os prazos sempre dentro do "cumprimento da lei" e os órganos da Cámara, onde Alfonso Rueda lidera un grupo cunha maioría absoluta de 40 dos 75 escanos, empezaron a dar pasos para iso.
UN SÓ NOME
Tras a falta de consenso constatada entre os grupos e cun só nome (a proposta do PP) encima da mesa, a comisión de control dos medios públicos albergará este venres o debate da proposta. E a falta de ratificar oficialmente polo órgano correspondente, a previsión é que o seguinte paso, a comparecencia de Pombo, se materialice o 27 de maio tamén en comisión. O primeiro pleno ordinario ao que podería ir, de acordo co calendario sobre o que se traballa --sen estar este pechado a cambios--, é o dos días 10 e 11 de xuño.
Se non se alcanza a maioría de dous terzos da Cámara (50 votos), as normas especifican que "no prazo dun mes poderase repetir a votación". Dentro dese mesmo mes, xuño, está previsto outro pleno para os días 24 e 25, onde Pombo podería ser elixida directora xeral da CRTVG con 45 votos de deputados (seguirían sen bastar os 40 populares en solitario).
Concepción Pombo Romero é unha estreita colaboradora do equipo de Sánchez Izquierdo. Licenciada en Ciencias da Información pola Universidade de Santiago de Compostela (USC), leva dúas décadas na corporación dos medios públicos autonómicos. Desde o ano 2017 é directora da área de Información e Documentación
O PP DEFENDE O seu PERFIL "INDEPENDENTE"
Os populares tamén inciden en que esta proposta para suceder a Alfonso Sánchez Izquierdo ratifica a aposta "polo talento e polos propios profesionais" dos medios públicos autonómicos, no canto de optar por promocionar a directivos alleos aos mesmos. Ademais, os populares remarcan que conta con experiencia na coordinación e xestión de recursos humanos, tendo en conta que xa exercía un cargo directivo.
Pero a distancia nas visións ratificouse tras rexistrar o nome o PPdeG, quen reivindicou a súa aposta por "un perfil independente e de consenso".
A CRTVG "MÁIS PEPERA" DA HISTORIA
A oposición frontal dos rivais políticos do PPdeG non tardou en ratificarse cos primeiros pronunciamentos. Así, o BNG, a través do seu viceportavoz Olalla Rodil, ve na proposta de Concepción Pombo "a culminación dun dedazo anunciado" para profundar no control político do ente. "O PP nunca quixo negociar absolutamente nada e confirma a súa aposta para que a compañía siga sendo o seu terminal de propaganda", esgrimiu Rodil, antes de lamentar: "Estamos ante a CRTVG máis 'pepera' da historia e vai seguir sendo así".
Pola súa banda, o PSdeG sostén que Pombo é "a responsable directa da etapa da maior manipulación informativa" dos medios públicos e "da maior caída da audiencia dos seus servizos informativos". "É a proposta máis radical e situada á dereita de todas as posibilidades que tiñan. Está a anos luz de calquera propósito negociador cos grupos parlamentarios", agregou.
Os socialistas cren que esta proposta indica "o camiño elixido" polo presidente galego, Alfonso Rueda: "incrementar a manipulación informativa" --denunciada polo colectivo Defende a Galega, entre outros, con iniciativas de protesta como os 'Venres Negros'--. E que tamén constitúe un premio "ao equipo máis sumiso ás ordes da Xunta da historia dos medios públicos".
Sumar, a través do seu secretario xeral e tamén profesor da Facultade de Ciencias da Comunicación da USC, Paulo Carlos López, manifestou a oposición a Pombo, ao considerar que a súa proposta "non é o perfil adecuado", senón "parte do problema que ten a actual CRTVG". Por iso, pide a súa "retirada" e que os populares busquen "consenso" real.
Pola súa banda, preguntado ao termo da Xunta de Portavoces sobre como avalía a proposta popular, o deputado de Democracia Ourensá (D.O.), Armando Ojea, quen dixo descoñecer o nome que rexistraran os populares, insistiu en que el xa expuxo a Pazos algúns trazos do perfil que considera idóneo para dirixir a CRTVG.
COMITÉ INTERCENTROS CRTVG
A presidenta do Comité Intercentros da CRTVG, Raquel Lema, afirmou que a proposta do PPdeG de que Concepción Pombo sexa a próxima directora xeral da corporación que aglutina aos medios públicos galegos foi recibida como "unha sorpresa desagradable" e augura que se traducirá en "continuidade total e absoluta".
Aínda que avanza a intención do Comité de solicitar un encontro con Pombo para concretar os plans que ten e reiterar unhas demandas do persoal que, sostén, "xa coñece", a condición de que se confirme o seu desegnación, manifestou que sería desexable que se "repensase" a proposta e buscásese unha vía de maior "consenso".
Se non se fai, augurou que Pombo será nomeada directora xeral "só cos votos do PPdeG" e evidenciarase "que a modificación da lei só buscaba iso" tras a defensa "de face á galería" que se querían impulsar outros cambios e apostar pola renovación.
A lectura do Comité Intercentros é que Pombo representa "un reforzo" e "un premio" ao equipo directivo que ata agora capitaneaba Sánchez Izquierdo. "É avalar a súa xestión e premiala", lamentou, para concluír que, para esta conclusión, "non había que facer tanto paripé".
En todo caso, a presidenta do Comité Intercentros trasladou a vontade de escoitar á futura directora xeral, se se confirma a súa designación, e, aínda sen ter moi altas expectativas respecto diso, garantiu que sería aplaudida "se trae un proxecto diferente".
¿Gustouche esta nova?
Colabora para que sexan moitas mais enviando un SMS coa palabra GC ao 25511
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións). Agradecemos a túa colaboración.
O nihilismo político é insoportable ! Non teño nin idea de quen vén sendo Concha Pombo pero aínda teño menos idea dos nomes propostos por BNG e PSOE ? Eses sí que son un Misterio da Comunicación ? Pero se falamos de "manipulación" será que non miran a Noite 24 Horas con Xabier Fortes tódolos días de Dios dando a matraca Oficial do Réxime ? Eso non debe ser manipulación, seguramente son os Informativos Democráticos de Pedro Sánchez e Cía. En fin, cando menos propoñer unha terna para elixir entre 3 aspirantes ao cargo pero se nin siquera teñen un par de nomes que presentar, quédome coa postura do Comité Intercentros : agardar e ver se temos un Proxecto ou non temos Nada de Nada !
A xornalista Concepción Pombo.. CEDIDA POLO PPDEG
