O Sindicato Unificado de Policía (SUP), organización maioritaria na Policía Nacional en Ourense, emitiu un comunicado no que advertiu aos cidadáns contra as iniciativas que "pretenden suplantar as funcións policiais" e instounos a colaborar facilitando información a través das canles legais.

Todo iso, por mor da formación de patrullas veciñais ante o crecente alarmismo pola inseguridade nalgúns barrios. Desta forma, o SUP subliñou o compromiso dos axentes que "pon todo o esforzo e dedicación posible para previr e preservar a orde pública as 24 horas do día". O sindicato pediu á cidadanía que confíen no labor das Forzas e Corpos de Seguridade do Estado e reclamou ao Ministerio do Interior unha "maior dotación de medios" para responder ás actuais necesidades de seguridade na cidade.

Tamén sinalou que, máis aló da intervención policial, a situación nalgunhas zonas require medidas de carácter social e sanitario. Así mesmo, reiterou a necesidade de actualizar o Catálogo de Postos de Traballo (CPT) de 2008, considerando que "os métodos delituosos evolucionaron exponencialmente".

Entre as súas principais reivindicacións, figuran a implementación completa da Unidade de Prevención e Reacción (UPR), a creación dun sector da Brigada Móbil na estación intermodal e unha unidade de UDYCO en Ourense.

"NON SON DE FIAR"

Pola súa banda, o subdelegado do Goberno en Ourense, Eladio Santos, desaconsellou expresamente a organización de patrullas veciñais. Ao seu xuízo, "non son de fiar e non traen nada bo" porque "non se sabe quen a forma". Neste sentido, Santos instou á cidadanía a confiar na Policía Nacional que "leva meses traballando en operativos na zona".

Así mesmo, a Policía Nacional inspecciona os grupos de plataformas de mensaxería instantánea das denominadas patrullas cidadás para previr posibles delitos de odio, os cales poderían carrexar accións legais.