O secretario xeral do PSdeG, José Ramón Gómez Besteiro, esixiu desculpas ao PP tras o arquivo da última peza da 'Operación Pulpo', que investigaba a suposta adxudicación ilícita dunha praza e malversación de fondos públicos en programas da Deputación de Lugo. "Creo que o PP debe pedir perdón. Feijóo e Rueda, que eran responsables da organización deste partido nese momento, deben pedir perdón e asumir responsabilidades políticas", aseverou.

A preguntas dos medios este luns en rolda de prensa, o líder dos socialistas galegos insistiu en que a actual presidenta do PP de Lugo, Elena Candia, foi quen transmitiu o anónimo que deu inicio a esa instrución. Así mesmo, cuestionado polas palabras da xuíza que iniciou o proceso, Pilar de Lara, que en publicacións en Facebook reprochou as críticas do PSdeG sobre o seu labor xudicial nesta causa, Besteiro afirmou que o "único" que ten que dicir sobre a maxistrada é "o que o Consello Xeral do Poder Xudicial (CGPJ) decidiu cando foi sancionada". "Fixarse como acabou todo: a única sancionada e condenada foi Pilar de Lara", subliñou.

"Neste caso, xuntáronse a fame coas ganas para comer", manifestou en referencia ao PP e á xuíza e apuntou que a cuestión "rematou como todos sabemos que remata" tras 12 anos de "máis de 60 tomos xudiciais e inxentes recursos públicos", dos que, engadiu, "parece que ninguén se acorda agora". Nesta liña, reiterou que os populares deben "asumir responsabilidades" ou "polo menos pedir perdón" por "terse claramente equivocado".