A misión oceanográfica francesa que se desenvolve estes días fronte á costa galega detectou máis de 600 novos bidóns con residuos radioactivos no fondo da Fosa Atlántica, elevando o total de recipientes localizados a 1.800. O achado, que volve poñer o foco sobre un dos maiores vertedoiros submarinos de Europa, foi anunciado por Javier Escartín, director da expedición, a través da rede social Bluesky.

A bordo do buque oceanográfico L’Atalante, o equipo francés emprega o robot submarino UlyX, dotado de tecnoloxía de alta precisión, para documentar e mapear o depósito de residuos nucleares que permanece oculto a uns centos de quilómetros da costa galega. O novo achado produciuse nunha zona xa explorada no ano 1983 polo submarino operado en remoto Epaulard, tamén de bandeira francesa, o que suxire unha dispersión máis ampla do que se estimaba ata o de agora.