O BNG non reclama aínda a convocatoria de eleccións xerais, porque considera que o seu pacto de investidura co PSOE "ten aínda moito por cumprir", pero farao "se se descobre" que "hai algún tipo de corrupción que implique ou salpique ao Goberno". Así o sinalou este luns a viceportavoz do Bloque no Parlamento galego, Olalla Rodil, ao ser preguntada polos medios sobre se cre que o presidente do Executivo estatal, Pedro Sánchez, completará a lexislatura ata 2027.

"Non fago prognósticos", respondeu Rodil, para seguidamente emprazar a ver que ocorre o mércores, cando está prevista a comparecencia de Sánchez no Congreso para, entre outras cousas, anunciar medidas anticorrupción tras a implicación do xa exsecretario de Organización do PSOE, Santos Cerdán, nos casos do exministro José Luís Ábalos e Koldo García. A responsable nacionalista confía en que o presidente ofreza unhas explicacións "claras e contundentes", aínda que xa chegan "tarde". Tamén espera que as medidas impliquen tamén á empresa "que promoven a corrupción política".

Para a viceportavoz parlamentaria do BNG, os cambios anunciados no seo do Comité Federal do PSOE do sábado "pode servir para a militancia" do partido, pero cre que non para o conxunto da sociedade. Por iso, remítese ao que anuncie Sánchez o mércores, que debe estar "á altura do que merece a democracia". Nunha entrevista a pasada fin de semana en 'La Voz de Galicia', a portavoz nacional do Bloque, Ana Pontón, apostaba precisamente por que "a cidadanía" tería que falar nuns comicios se se "demostra financiamento ilegal do PSOE".

O PP "MÁIS ULTRA"

En canto ao Congreso Nacional do PP, no que Alberto Núñez Feijóo saíu reelixido presidente, Olalla Rodil advertiu que saíu cun posicionamento "máis ultra, na forma e no fondo". "Van con todo", sinalou a viceportavoz do BNG, para insistir en que os populares se "abrazan ao discurso da extrema dereita". Rodil referiuse, máis en concreto, aos documentos aprobados no conclave do PP, que falan de "denuncias falsas" no seu ideario político fronte ao que din os datos oficiais do Consello Xeral do Poder Xudicial. "O real é que temos a tres mulleres asasinadas pola violencia machista nos últimos meses en Galicia, dous delas en menos de 15 días", engadiu.

A isto sumou o "discurso racista" que, ao seu xuízo, adopta o PP coa migración e o recurso de inconstitucionalidade anunciado pola Xunta fronte á repartición de menores. "Falamos de seres humanos", apostilou Rodil. Fronte a un PP "cada vez máis botado ao monte", a nacionalista asegurou que os galegos "non son así", nin "racistas" nin "machistas", e por iso destacou ao BNG como un "proxecto aberto, sólido, unido" que ten vocación de "servir" a Galicia e facela "máis respirable", fóra de "esa crispación e ese discurso ultra" do PP.