O BNG de Marín non participará no acto, que terá lugar este luns, no que se entrega á princesa Leonor a distinción de Filla Adoptiva e considera que o recoñecemento "non representa" ao conxunto dos veciños.

Nun comunicado, a formación nacionalista xustificou a súa ausencia por "coherencia" coa postura que mantivo no pleno do 13 de novembro de 2024, no que o nomeamento foi aprobado cos votos a favor do PP e do PSOE.

Así, o BNG volveu advertir de que este recoñecemento "non representa" ao conxunto dos veciños, senón que responde a unha "lóxica herdada do franquismo, que non ten cabida nun sistema plenamente democrático".

"Recoñecer institucionalmente a alguén polo simple feito de ser descendente de quen é, sen unha vinculación real ou significativa co pobo, perpetúa unha visión discriminatoria incompatible cos valores republicanos e igualitarios que defendemos", sinala o BNG.

A liña segudio, matizaron que "non teñen nada persoal" contra a princesa Leonor, pero consideran que a súa presenza en Marín "non foi nin significativa nin transcendente como para merecer tal distinción".