Un operativo de emerxencias localizou sen vida ao mozo de 14 anos que se lanzou a nadar este xoves na lagoa de Pedras Miúdas, en Catoira e non volveu emerxer.

Segundo informou o CIAE 112 Galicia, ás 18,30 horas deste xoves un amigo contactou para avisar de que o mozo levaba máis de dous minutos debaixo da auga sen dar sinais.

Conforme sinala o 112, o mozo dixo que "era practicamente imposible que saíse por outra zona e insistía en que seguía dentro da lagoa".

Con esta información, o CIAE solicitou a intervención dos Bombeiros do Salnés (con equipo acuático), membros do GES de Padrón, Protección Civil de Catoira e axentes da Garda Civil. Ademais, alertouse a Urxencias Sanitarias de Galicia-061.

Á súa chegada ao lugar dos feitos, os axentes confirmaron que seguía mergullado e que, debido á profundidade da lagoa (aproximadamente 30 metros), debían reorganizarse para realizar outro tipo de rescate. Por iso é polo que se sumou ao operativo un equipo do Servizo de Gardacostas de Galicia.

O corpo foi localizado e recuperado por mergulladores de Gardacostas. Profesionais do Grupo de Intervención Psicolóxica en Catástrofes e Emerxencias (GIPCE) do Colexio Oficial de Psicoloxía de Galicia uníronse ao operativo.