ABANCA puxo en marcha o Programa ABANCA Innova, unha iniciativa de promoción do talento dirixida a axudar formativa e laboralmente a universitarios para que poidan desenvolver e facer realidade os seus proxectos de innovación. O Programa está orientado a proporcionarlles as habilidades e metodoloxías de traballo necesarias para que poidan crear a súa propia start-up ou desenvolver e ver implantado o seu proxecto de innovación dentro de ABANCA.

“O Programa ABANCA Innova forma parte do noso compromiso co coñecemento e a innovación, as dúas palancas que consideramos máis poderosas para xerar desenvolvemento económico e social na nosa contorna”, sinala María Camino, directora xeral de Capital Humano de ABANCA.

O Programa Innova ABANCA está dirixido a titulados universitarios (grao, licenciatura, diplomatura, enxeñaría técnica ou superior, máster ou posgrao) que obtivesen a súa titulación por algunha das universidades e centros académicos de Galicia, Asturias e León.

Innovación financeira

Os candidatos deberán presentar un proxecto de innovación aplicable á actividade financeira, como a planificación de novos produtos e servizos, a mellora da experiencia de cliente, a creación de novas canles ou aplicacións, etc.

ABANCA seleccionará a cinco deles e ofreceralles un paquete de impulso integral en dous bloques, formativo e laboral. No primeiro deles, cunha duración de 12 semanas, ABANCA becará aos cinco seleccionados para a realización do Programa Avanzado de Lean Innovation baseado na metodoloxía Kickbox de Adobe.

Ao final deste período, entre os cinco participantes seleccionarase a un innovador que pasará á seguinte fase, na que ABANCA ofreceralle un contrato dun ano, tempo no que, integrado nos equipos de desenvolvemento de novas ideas, participará no desenvolvemento e implementación do proxecto dentro do banco.

Proceso de selección

A selección dos cinco innovadores participantes realizarase a través da web www.abanca.com/innova, canle á que os candidatos deberán remitir as súas solicitudes. O prazo iniciarase o 22 de xuño e finalizará o 12 de xullo, ambos incluídos. A comunicación das candidaturas seleccionadas terá lugar na última semana de xullo.