Seminario Brand positioning
Este seminario será impartido integramente en inglés. O que pretende é transmitir aos asistentes a importancia crucial do branding dentro da estratexia comercial dunha compañía; mostrar como se constrúe ou se renova o posicionamento dunha marca; amosar os novos retos e oportunidades que trae consigo a revolución dixital e ensinar aos asistentes a desenvolveren unha estratexia de xestión de marca.
Os contidos están estruturados en catro puntos: que é o branding; as claves das marcas e o posicionamento; a importancia dun obxectivo de marca e o branding e a revolución dixital.
Será impartido por Javier López-Valcárcel Herrero, quen traballou durante 15 anos na área de Marketing de Nestlé, Sara Lee e Panrico-Donuts, e durante máis de 10 anos como director de Marketing e membro da Xunta Directiva, liderando equipos nacionais e internacionais. Desde 1999, Javier tamén exerce como profesor de Marketing, Innovación e Branding de ESADE, así como doutras universidades e empresas internacionais.
Seminario Planificación comercial
Os obxectivos a acadar inclúen sensibilizar ao alumno sobre a relación plan comercial - control comercial no marco do plan global da empresa; introducir algunhas técnicas de control comercial e sensibilizar os asistentes sobre a importancia da dimensión humana no seguimento como complemento á dimensión técnica do control.
Os contidos están estruturados en 4 puntos: a planificación comercial, o proceso de planificación comercial, o presuposto de vendas e o control de xestión da función comercial.
Será impartido por Juan Carlos Vez Vázquez. Licenciado en Ciencias Económicas e Empresariais pola Universidade de Santiago de Compostela, DEA en Organización de Empresas e Marketing pola Universidade de Vigo e Executive MBA pola Escola de Negocios Afundación. Foi xerente nacional de Vendas División Food Service de Pescanova Alimentación e director comercial do Grupo Pescapuerta, entre outros desempeños profesionais.
