O incendio forestal declarado no municipio lucense de Folgoso do Courel permanece estabilizado este venres, mentres que están controlados outro cinco, catro deles nos municipios ourensáns de Chandrexa de Queixa, Castro Caldelas, Monterrei e Montederramo e outro en Cervantes (Lugo). Entre todos calcinaron máis de 1.100 hectáreas.

Segundo informa a Consellería do Medio Rural, desde as 18,17 horas do xoves está estabilizado o incendio iniciado ás 18,16 horas do mércores na parroquia de Meiraos, no municipio de Folgoso do Courel, onde queimou unhas 35 hectáreas.

Mentres, está controlado desde as 23,33 horas do xoves o lume que comezou o martes ás 19,34 horas na parroquia de Queixa en Chandrexa de Queixa e que se reactivou o xoves debido á calor e o vento. Neste caso arderon unhas 369 hectáreas, boa parte delas en Rede Natura.

Na provincia de Ourense, así mesmo, está controlado desde as 2,37 horas deste venres o lume declarado ás 18,27 horas do martes na parroquia do Burgo, en Castro Caldelas, que queimou unhas 265 hectáreas.

No termo municipal ourensán de Monterrei o incendio declarado ás 17,41 horas do martes continúa controlado desde as 12,30 horas do xoves na parroquia de Infesta. As últimas estimacións sitúan a superficie afectada en 384,06 hectáreas, das cales 327,07 son de raso e o resto de arborado.

Polo seu lado, segue controlado desde as 19,34 horas do luns o incendio declarado ás 13,55 horas desa xornada na parroquia de Marrubio na localidade ourensá de Montederramo. A superficie calcinada ascende a 42 hectáreas, das cales 18 son de monte arborado e 24 de raso.

PROVINCIA DE LUGO

Tamén se atopa controlado desde as 1,50 horas deste venres o incendio forestal rexistrado ás 1,22 horas do xoves na parroquia de Vilarello no municipio lucense de Cervantes, que afecta a máis de cen hectáreas.

Polo seu lado, quedou extinguido ás 20,36 horas do xoves o incendio que comezou ás 15,24 horas do mércores na parroquia de Pambre no municipio de Palas de Rei (Lugo). As últimas estimacións sitúan a superficie queimada en 51,43 hectáreas forestais --21 de arborado e 30,43 de raso-- e 5,33 hectáreas agrícolas.