Numerosos pacientes teñen denunciado a
saturación dos servizos de urxencias dos hospitais galegos. E non só estes días, onde o pico da gripe está sendo máis intenso, senón desde
comezos do pasado mes de decembro. Unha situación que mesmo
criticaron os xefes de servizo de Urxencias de Galicia. E, a pesar diso, Feijóo defendeu hoxe, como xa fixo con anterioridade, a atención nos hospitais galegos.
“Hai incomodidades estes días, pero, insisto, non só en Galicia. Aquí estamos dando un servizo aceptable e agradezo a profesionaidade dos traballadores do Sergas a quen dou todo o meu apoio”, suliñou Alberto Núñez Feijóo na rolda de prensa posterior ao Consello da Xunta ao ser preguntado polas numerosas queixas dos usuarios e dos propios profesionais da sanidade pública.
MELLORAS
O presidente galego recoñeceu que existen incrementos de ingresos provocados polos picos da epidemia da gripe pero insistiu en que a Xunta xa ten activados todos os plans de continxencia previstos. Neste sentido, suliñou que se cubriron todas as ausencias nos servizos de urxencias con máis persoal e se incrementaron os servizos de hospitalización e do 061.
Ademais, defendeu a campaña de vacinación contra a gripe deste ano “aínda que non se cumpliron o 100% dos obxectivos” e destacou que de cada 100 persoas atendidas en Urxencias, só 18 quedaron ingresadas. Con todo, recoñeceu que hai cousas por mellorar, sobre todo, protocolos, e insistiu en que xa se traballa coas xerencias dos hospitais para “organizarse do mellor xeito posible”.
APOSTA POLA HOSPITALIZACIÓN EN PLANTA
E neste sentido, amosouse partidario de trasladar a pacientes de Urxencias a planta, aínda que non teña o 100% de calidade que deste servizo se pode agardar. “Pero seguro que vai estar mellor que en Urxencias e o importante é buscar a comodidade e o benestar dos pacientes”, dixo.
Con todo, tamén insistiu en facer un chamamento aos pacientes para que non acudan en masa aos servizos de Urxencia, o que provoca o seu colapso. Así, dixo, hai outras alternativas para que sexan asistidos. “Teñen un teléfono no qu falar co seu médico de cabeceira. Tamén poden ir aos centros de saúde, ser atendidos polo 061 ou acudir aos Puntos de Atención Continuada”, concluíu.