O presidente da Xunta, Alberto Núñez Feijóo, prevé aproveitar o Debate sobre o Estado da Autonomía, que se celebrará entre o martes e o xoves da próxima semana na Cámara galega, para anunciar novas rebaixas fiscais, que contraporá coa "ameaza de subida de impostos" e o "dieselazo" do Executivo que dirixe Pedro Sánchez. Fontes de Presidencia da Xunta anunciaron que Feijóo ultima co seu equipo de Goberno durante esta fin de semana os puntos que abordará no que será o segundo debate de política xeral do seu terceiro mandato como titular da Xunta.

Entre os eixos do discurso no que traballa nas últimas semanas, sitúase a intención de "renovar o seu compromiso con novas rebaixas fiscais que beneficien ás familias galegas". A súa contorna contrasta este compromiso con novos beneficios fiscais cun panorama estatal no que "a sombra da desaceleración económica vese agravada por un Goberno central que ameazou reiteradamente con varias subas de impostos".

OPOSICIÓN AO "DIESELAZO"

Na súa intervención ante a Cámara, o presidente galego mostrará "a súa oposición" a estas medidas, especialmente á subida do imposto ao diésel, que supón o 85 por cento do combustible total que se emprega en Galicia. Feijóo destacará que este "dieselazo" afectaría os fogares con rendas máis baixas, ademais da a industria automobilística, da que dependen miles de familias galegas.

1.100 MILLÓNS DE IMPACTO ATÉ AGORA

"Mentres que o Goberno de Pedro Sánchez ameaza con subir impostos, o Goberno de Feijóo volverá comprometerse con novas baixas fiscais que se concretarán cando presente os orzamentos", avanzan desde a contorna do mandatario autonómico.

Á espera do detalle das novas medidas que porá sobre a mesa o martes, o presidente pretende dar "un paso máis" nunha política de vantaxes fiscais que, até o momento, traduciuse nun impacto de "1.100 millóns" de euros.

Entre estas medidas, que "aplicadas ou mantidas nos últimos anos" supoñen uns 1.100 millóns, atópanse a redución do IRPF para "a ampla maioría dos galegos", a supresión do tributo de doazóns e sucesións "para o 99 por cento dos cidadáns", o plan de 'impostos cero' no rural e, este mesmo ano, as novas deducións para investir na rehabilitación dos centros históricos e do chan industrial.