O alcalde de Santiago, Martiño Noriega, apelou este luns ao "diálogo" para tratar de liquidar o conflito aberto no seo de En Marea tras quedar en suspenso a votación para renovar a dirección do partido rupturista --o Consello das Mareas--, unhas primarias nas que competían dúas listas, unha encabezada polo actual portavoz, Luís Villares, e outra ligada ao sector crítico, que encabeza David Bruzos.

A Comisión de Garantías suspendeu as primarias o venres 30 de novembro ao detectar supostas irregularidades ligadas co censo do proceso, unha decisión que o comité electoral, con ampla maioría do sector crítico, negouse a aceptar nun primeiro momento, o que recrudeceu a batalla interna en En Marea, con cruces de acusacións de fraude a cargo das dúas partes en liza --'villaristas' e críticos--.

Á espera de novos pasos, o alcalde de Santiago, Martiño Noriega, manifestou, antes de participar nun acto na capital galega, que é preciso "entender que a solución, o debate interno, pasa polo diálogo, e un horizonte de votación" que espera "canto antes", e que permita "escoller un Consello das Mareas que reflicta a pluralidade do conxunto do espazo".

"Creo que iso é absolutamente necesario, non só por unha cuestión interna, senón tamén polo contexto exterior", esgrimiu Noriega, quen aludiu á situación "de emerxencia" pola "extrema dereita". Neste punto, o rexedor compostelán chamou a "estar á altura das circunstancias históricas".

BRUZOS NEGA ESCISIÓNS

David Bruzos, á fronte da lista rival da candidatura do actual portavoz de En Marea, Luís Villares, no proceso de primarias para renovar a dirección do partido instrumental, rexeitou este luns que poida haber "unha escisión" salvo que a votación prevista non chegue a producirse.

"Non vai haber unha escisión de En Marea, rotundamente non, só sería posible se non se producen as eleccións", trasladou, nunha entrevista na TVG, na que, sobre as datas nas que deberían realizarse, manifestou que non se fala "de prazos concretos". "Pero teñen que ser canto antes, en canto cheguen os datos das auditorías", remarcou.

Bruzos sinalou, sobre a suspensión das primarias, que a súa candidatura se atopou con "unha situación de sorpresa", xa que "un órgano interno suspende as eleccións por suposto fraude e, a día de hoxe, non hai información algunha de que existise".

"Quen paralizou as votacións foi a Comisión de Garantías, un órgano en funcións que é parte interesada porque tamén se vai a renovar", sentenciou, antes de esgrimir que ve preciso pedir a Villares e á actual coordinadora as "explicacións necesarias", á vez que sinalou que debe haber un órgano "que arbitre o proceso".

Con respecto á súa candidatura, manifestou que estaría baseada "na integración, na diversidade e na igualdade", e recoñeceu que contan cos apoios "das cidades rebeldes". Engadiu que representa "a pluralidade" e que só se centra "na coordinación" para os próximos dous anos. "Ninguén está a pensar na candidatura para a Xunta", garantiu.

Finalmente, preguntado sobre as diferenzas coa candidatura de Villares, destacou que, se el gana, non fará declaracións "pondo en dúbida" a militancia de persoas do seu partido e non atacará a alcaldes por non compartir liña política.