No ano 2009 a campaña electoral dos populares, estando á cabeza o Sr. Feijoo, estivo baseada, entre outras cousas:  no inexistente conflito lingüístico; nas fotos do vicepresidente Quintana nunha embarcación; no valor dunhas cadeiras e na suposta ilegalidade do concurso eólico.

 

Pasados os anos a xustiza e, concretamente o Tribunal Supremo de Galicia,  falou claro e dixo que concurso eólico do bipartito era legal.  Pero os feitos son que aquil concurso foi derrubado para satisfacer non se sabe ben a quén. Agora tócanos a todos os galegos pagar os importantes  custes económicos da chapuza que fixo o goberno de Feijoo. Si, haberá que resarcir as esixencias económicas das empresas que foron arredadas e perxudicadas.

Pero esta nova pasou case desapercibida para a grande maioría dos galegos, e posiblemente non terá repercusión no tocante a un castigo electoral para os que cometeron a tropelía baseada na mentira contra o bipartito de Touriño e Quintana.

 

En fin, isto lévanos a pensar na cantidade de mentiras e maledicencias que se lanzan nas campañas electorais. Así topamos persoas que por buscar réditos electorais e teñen un medio de difusión lanzan ó vento acusacións graves que nunca son validadas ou demostradas. O importante é crear un ambiente de calumnias permanente. “En esta casa, (referíndose o concello,  decía unha televisión local), le están robando.” Mentira tras mentira, difamación tras difamación,  pois os que  dirixen  esta campañas son sabedores das debilidades  e do esquecemento dos electores. Son coñecedores da lentitude da xustiza, e da fraxilidade da mente humana. No 2009, Feijoo apoiado por determinado medio, ben untado economicamente, orquestou unha campaña chea de falsidades e medias verdades, e acadou o poder. Ise era o obxectivo, o demais un conto.  E agora quen se lembra da mentira do conflito lingüístico; quen se lembra do Yate, das cadeiras, e outras trolas que se verteron. Ninguén. Pero agora hai que pagar a escote os custes dunha mala, moi mala decisión que impediu diversificar e repartir entre moitas empresas galegas a produción de enerxía eólica. Por iso, canto temos que aprender como cidadáns, canto.